مع كل الإحترام لجامعتنا , و مع التقدير للأساتذة المخلصين في عملهون , بس يا شباب يلي فهمان بأنو الجامعة تبعنا جامعة قوية , فهمان غلط , عملياً المناهج المعطاة حالياً في جامعتنا هي مناهج خارج التاريخ تماماً , وممكن تكون بتقرب أكتر لقسم المتاحف و المكتبات من كونها هندسية , ويلي بيحب يبررمسألة عدم تحديث المناهج بحجة أنو المبادئ الأساسية ما بتتغير بالهندسة ,هذا الكلام مضلل نوعاً ما , و هو كلام حق يراد به باطل , نحن ما في أشطر منا بتضليل الناس و تضليل حالنا , على سبيل المثال مبدأ أساسي من مبدأ الإتصال هو وجود مرسل و مستقبل و قناة للنقل , هل هي المعلومة كافية فقط لحتى اليوم نعلم مهندسي الإتصالات كيفية التعامل و فهم بروتوكولات الإتصال بالإنترنت اليوم , أكيد لأ , طبعاً اكيد هي مبدأ و طبعا أكيد لازم يعرفها الطالب بس طبعاً أكيدهي ما نها كافيه أبداً و نفس الشي بالنسبة للمبادئ الأساسية يلي موجودة بمناهجنا و يلي ما طرحت التطبيقات الحديثة لهل المبادئ بحياتنا اليومية و التطورالتكنولوجي المذهل الحاصل بالخمسين سنة الأخيرة
المهم خلينا بالموضوع , الغاية من هل البوست هو الحديث عن المشاكل يلي بتواجه طلاب الهندسة السوريين , لا سيما بالجامعات الحكومية لا سيما بكليتنا , كلية الهندسة الكهربائية و الميكانيكية و جميع تفرعاتها , ما بعرف اذا كمان انتقل المرض للجامعات الخاصة بس ربما لسا بالمراحل الأولى , المهم : المشاكل من وجهة نظري الشخصية هي :
1) فقدان الإتصال مع الواقع , كحالة مجتمعنا عامة , أحد الأمراض السارية بالمجتمعات المتخلفة (طبعا نحن بالطليعة من دون شك ) , أخر مرة حقيقة استعمل فيها الأستاذ أو المحاضر في المدرسة أو الجامعة معلوماتو النظرية لحل مشكلة على ارض الواقع هي : ولا مرة , طبعا أكيد , وهذا اهم شي بقدمو العلم للإنسان , ألا و هو : تقديم حلول لمشاكل الحياة , و خدمة الناس و تحسين طريقة حياتون , فاقد الشيء لا يعطيه و هذا حقيقة هو واقع الأساتذة بالجامعات , كيف ممكن يخلونا نحن الطلاب نحترم العلم و نعرف كيف نستعملو بحياتنا اليومية , بينما هنن نفسون ما بيعرفوكيف, ولذلك بشكلوالاساتذة نموذج سلبي للطلاب ببداية حياتون العلمية, وبخلون يفقدو الأمل بالعلم في وقت مبكر جدا
2) عدم كفاءة الأساتذة : بشكل كتير طبيعي , كل طالب بيتطلع لأستاذو على أنو قدوة بالحياة , و الصدمة بتكون لما الطالب بلاقي هل الأستاذ حدا غير محترم , و أكتر من هيك , قدوة سيئة سواء كان من الناحية العلمية , نتيجة لعدم كفائتو , أو لإعتماد الواسطة كوسيلة بديلة للوصول , بالاضافة طبعا انو الاساتذة نفسون ما بيأمنو بأنو العلم هو الطريق لتحسين حياة الناس , ما بحترمو بشكل فعلي المتعلمين , بيعتقدو ضمنياً أنو الأكثرأهمية بالسلم الاجتماعي هو الشخص يلي بيملك المال بغض النظر عن أي مؤهل علمي ( رجل الأعمال , التاجر ,.......الخ ) .
3) ضعف مناهج اللغة الإنكليزية : اليوم متل ما كلنا منعرف , العلوم كلها مدونة باللغة الانكليزية , ولا سيما اخر الابحاث والعلوم الحديثة , بينما المحتوى العربي سواء كان على الانترنت أو إنتاج المؤلفين العرب السنوي بشكل رقم ضئيل جدا على مستوى العالم ما بيتجاوز ال 3 %, بمعنى اخر لما ما منتعلم إنكليزي , يعني عملياً نحن منكب بالبحر 97 % فقط من قيمة العلوم والأبحاث الحديثة المدونة
ليست هناك تعليقات:
إرسال تعليق